Fipur til heimið

Fínt sum hár

Fipurnet kollveltir tøknina, vit kenna í dag. Tøknin letur upp fyri, at telefeløgini kunnu bjóða ferðir heilt upp til 1000Mbit og meira.

Fipur er ein nútímans tøkni, sum gevur ógvuliga skjótt og álítandi internetsamband gjøgnum ljósleiðaratægrar, ið eru til tjúkdar sum eitt hár.

Sjálvur fipurkaðalin er nakrar fáar millimetrar til tjúkdar og liggur vardur í sterkari rørleiðing, sum er átta millimetrar til tjúkdar og verður løgd inn til hvørt húsarhald. 

At leggja fipur inn til hvørt húsarhald er stór íløga, bæði fíggjarliga og í arbeiðsorku. Men fipurnet er skynsamari í rakstri enn verandi koparnet.

Tilfarið er bíligari, krøvini til kaðalveitingar eru minni, og fipurnetið verður neyvt kortlagt og skrásett við GPS-punktum. Harafturat er fipurnet lættari atkomuligt og lættari at umvæla.

Niðanfyri er filmur, sum vísir arbeiðið at leggja fipur inn til hvørt húsarhald. Her ber til at síggja, hvar fipur er tøkt, og hvussu ætlanin sær út komandi tíðina.

Hvar er fipur tøkt?

Róm var ikki bygt eftir einum degi, og sama er galdandi fyri fipur. At leggja fipur inn til hvørt húsarhald tekur tíð. Vit settu skjøtul á arbeiðið í 2018, og nú seks ár seinni hevur arbeiðið veruliga tikið dik á seg.

Morskranes og Kolbeinabjógv vóru fyrst, men nú hava fleiri enn 3.000 húsarhald runt í landinum møguleika at bíleggja fipurbreiðband. Í næstum koma enn og fleiri, tí á hvørjum ári seta vit út í kortið, hvar ið arbeiðið skal gerast.

Á kortinum niðan fyri er yvirlit yvir, hvar fipur er tøkt, og hvussu ætlanin fyri útbygging sær út. Kortið er bólkað soleiðis:

Fipur tøkt
Ætlað klárt 1. hálvár 2024
Ætlað klárt 2. hálvár 2024
2 ára ætlan fyri útbygging

Suma inn á kortið fyri at finna ávíst øki ella leita eftir bústaði í leitifeltinum. Har, ið einki av hesum bólkum er tøkt, merkir, at økið liggur uttan fyri tvey ára ætlanini fyri útbygging. Fyrivarni skal tó takast fyri broytingum í ætlanini.